Abaanduulaha Ciidamada Gaashaandhigga Talyaaniga oo booqasho ku yimid Muqdisho

Abaanduulaha Ciidamada Gaashaandhiga Talyaaniga Maj. Gen. Claudio Graziono ayaa maanta booqasho hal cisho ah ku yimid magaalada Muqdisho, isagoo kulamo la qaatay Ra’iisul Wasaaraha, Kuxigeenkiisa, Wasiirka Gaashaandhiga iyo Taliyeyaasha Ciidamada.

Kulankan ayaa diirada lagu saaray iskaashiga labada dal, dib u dhiska Ciidamada xoogga dalka, iyadoo Talyaaniga uu hogaaminayo howl galka Tababarka Ciidamada Soomaaliya ee Midowga Yurub, kaasoo sanadkii la soo dhaafay loo soo raray Soomaaliya.

Ra’iisul Wasaaraha ayaa sheegay in dowladda Talyaaniya Soomaaliya ka filaneyso kaalin balaaran oo wax ku ool u ah dalka iyo dadka Soomaaliyeed.

Wasiirka Gaashaandhigga Soomaaliya Mudane C/qaadir Sheekh Cali Diini, oo kulan albaabadu u xiran yihiin la qaatay Wafdiga ayaa xusay in booqashadani ay sii xoojin doonto taageerada dawladda Talyaanigu ay siiso Ciidamadda Xoogga dalka Soomaaliyeed. Kulankani ayaa waxaa sidoo kale looga hadlay xiriirka laba geesoodka , kobcinta iskaashiga labada dal u dhaxeeya , taageeridda Ciidamadda Xoogga dalka, la dagaalanka argagaxisada iyo qodobo kale.

“Maanta waxaa nagu soo booqday magaalada Muqdisho Abbandulaha Guud ee Ciidamadda Gaashaandhigga Talyaaniga Sareeye Guud Claudio Graziano oo booqasho hal cisho ah noogu yimid. Waxaa dalka Talyaaniga nagala dhexeeya iskaashi iyo xiriir qoto dheer.

Waxaan uga mahad celinayaa sida wanaagsan oo ay mar walba noogu garab taagan yihiin dadaalka aan ugu jirno xasilinta iyo nabadeeynta Soomaliya. Waxaan sidoo kale uga mahad celinaynaa sida wanaagsan oo ay uga qeyb qaateen dhismaha ciidanka Xoogga dalka.

Waxaa lagama maarmaan ah in mar walba uu hadafkeenu ahaado inaan sii xoojinno xiriirka labada dal maadaama aan nahay labo dal oo saaxiib ah oo aan kala maarmin” ayuu yiri Wasiir Diini.

Ra’iisul Wasaaraha ayaa sheegay in dowladda Talyaaniya Soomaaliya ka filaneyso kaalin balaaran oo wax ku ool u ah dalka iyo dadka Soomaaliyeed.

C/llaahi Warmooge

ARAABINEWS