Argagixisada shabaab caado waxay u leeyihiin xasuuqa dadka muslimiinta: Hay’ada culimada Somaliyeed

Muqdisho–Hay’ada culimada Somaliyeed ayaa bayaan cad ka soo saartey xasuuqyada ay argagixisada shabaab ka gaysanayso Somaliya qaasatan Koofurta iyadoo shalay oo u dambeysay ay xasuuqeen qoys shacaba oo aan waxba galabsan oo ay ku jiraan dhamaan caruur iyo waayeel iyo dumar oo ah inta diinteenu xaaraantimaysay in dhiigooda la taabto.

Argagixisada ayaa nabad-doona ku dishay deegaan hoostaga Qoryooley waxana lagu magacaabi jiray Bashiir Xasan Cabdulle Xuurshoow.

Sheekh Nuur Baaruud Gurxan oo la hadlayay Radio Muqdisho ayaa ugu horeyn ku tilmaamay falka wuxuushnimada ah ee ay Shabaabku ka geysteen Tuulo hoostagta Degmada Luuq iyo Degmada Qoryooleey mid ka baxsan diinta Islaamka, waxaana uu tacsi u diray ehelada dadka ay Shabaabku xasuuqeen.

“Musiibada ay sameeyeen nimanka argagixisada ee Khawaarijta ah marka hore aniga oo ku hadlaya magaca hay’adda culimada Soomaaliyeed waan cambaareynayaa, tankale falalka ay dadka ku laaynayaan diinta Islaamka raad kuma lahan, waxaana ku shaqeysanaya sheeydaamo” ayuu yiri Sheekha.

Sheekh Nuur Baaruud Gurxan ayaa xusay in sida kaliya ee Shabaab looga adkaan karo ay tahay in shacabka iyo dowladda ay si wada jir ah ula dagaallamaan argagixisada Shabaab, isla markaana loogu tego meelaha howdka ah ee ay ku dhuumaaleysanayaan.

“In la dabar gooyo ayaa kooxdan lagu baabi’in karaa, waayo waxa ay u dagaallamayaan ma ahan mid diinta Islaamka ay shaqo ku leedahay, waxaa kaloo jirta in Shabaab xasuuqa dadka rayidka ah ay caadi u leeyihiin” ayuu hadalkiisa ku soo gabo gabeeyay Sheekh Nuur Baaruud Gurxan.

C/llaahi Warmooge

ARAABINEWS