Ayadoo lagu gudo jiro xajka sidey ahayd soo dhaweyntii xujaajta ee magaalada Jidda

Jidda waxay ahayd weligeedba albaabka laga galo xaramka Makka iyo Madiina. Waxay ahayd magaalo xeebeed aan deked lahayn. Dadka magaalada degan ayaa lagu bartey soo dhaweyn aan loo kala harin oo ay u fidiyaan dadka xajka imaanaya.

Inkastoo dadka xajka imaanaya ay ahaayeen dad aad u yar 30-aadkii iyo wixii ka horeeyayba haddana waxa hoy siin jirey dadka reer Jidda.

”Waxaanu ku tagney markab aan ka raacnay Cadan sanadii 1929-kii ayuu igu yiri awoowgey sanadkii 1975 aniga oo markaa wiil dhalinyaro ah ayuu yiri Meygaag Faarax.

Waxa markabku istaagey meel xeebta waxooga u jirta maadaama ayna deked lahayn hadii kale waa degayaa, waxana na soo daadgureeyay doonyo qori ah iyo kuwo kale oo shiraaca oo xeebta na keenay.

Waxa markiiba na qaabilay qoys reer Jidda ah oo na dejiyay gurigooda qayta hoose xagga iyaguna deganayeen xagga sare ee guriga oo fooq ahaa. Xilligaa ninka fooq haysta wuxuu ahaa qof magaalada laga yaqaano waayo wuxuu soo dhaweyn karaa dad farabadan. Joogitaanka Jidda wuxuu inta badan ahaa laba maalin ilaa sadex ugu badnaan.

Ma jirin dawlad Sacuudi Careebiya la yiraa xilligaa laakiin waxa jirey maamulo hoostaga dawladii Cusmaaniyiinta ee Turkiga hadda ka dhisneyd. ”Markaan tagney guriga waxa gabaabsi naga ahaa cuntada iyo biyaha, waxaanan lacag u dhiibanay dadka aan martida u nahay si ay noogu soo iibiyaan cunto aan safarka la raacno ayuu ii sheegay.

”Inta badan safarka lagu tagayaa Makka wuxuu ahaa awr sii socda hal maalin. Awrkaas ama labada awr waxay jiidayaan alaabta iyo dadka oo ay ku jiraan haweenku. Haweenku waxay fadhiisan jireen qaybta dambe ee rarka.

Markaa Jidda iyo dadkeedu waxay ahaayeen dad barakaysan oo soo dhaweyn fiican. Ilaa hadda Jidda waxay kaga duwan tahay Sacuudiga intiisa kale, waa magaalo aanad ku arkayn waxa aad ku aragto WAHAABIYADA Sacuudiga intiisa kale.

Makka iyo Madiina

Markaan gaarno Makka iyo Madiina waxa iyaguna joogey dad ehlu kheyra oo guryahooda ku geyn jiray oo aad la joogeyso mudadaa xajku socdo. Waxayna kala lahaayeen magacaaan caan baxay xilligaa soo dhaweyntooda awgeed.

Waxa taariikhyahanadu sheegeen in xilligii dambe dadka xajka tagayaa ay bateen maadaama ay furmeen diyaaradaha ganacsiga iyo weliba dadka ku imaanaya maraakiibta waaweyn. Intaas wixii ka dambeeyay waxa la dhisay guryo ay xujaajtu ku hoydaan maadaama welli huteelo jirin.

Sawirka hoose waa Jidda