Taliyihii hore ee ciidamada nabad sugida Soomaaliya Axmed Macalin fiqi ayaa qoraal uu soo dhigay bartiisa internetka ee Facebook wuxuu si kulul kaga hadlay qaraxii shalay ka dhacay hotelka Jazeera ee magaalada Muqdisho.
Axmed Macalin Fiqi, wuxuu wax laga xumaado ku tilmaamay in la cambareeyo mar walbaa weerarada marka Alshabaab ay geystaan, isagoo sheegay in Alshabaab sidoodaba yihiin dad cambaareysan oo aan cambaareyn kale u baahneyn.
Sidoo kale wuxuu sheegay in ciidamada dowlada Soomaaliya loo baahan yahay in dowlada Soomaaliya u dhameystirkaa xuquuqdooda sida mushaaraadka iyo qalabka ay ku shaqeynayaan.
“Waa koox sideeda u canbaareysan, canbaareyn hor leh oo dusha looga ridaa waxba tari meyso, waxaa wax tarayaa waa in si dhab ah looga hortagaa dhibaatooyinka ay umadda u geysaneyso, ciidamada qarankana xuquuqdooda loo dhameystiraa, haddii kale ayaguna waa dilayaan, dadka iyo dawladduna waa aasayaan”ayuu yiri Axmed Macalin Fiqi.
Weerarkii ka dhacay hotelka Jazeera ee magaalada Muqdisho waxaa sheegtay Alshabaab waxaana ku dhintay ku dhawaad 15 ruux oo dad rayid ah iyadoo dhaawaca uu intaasi ka badan yahay.
C/llaahi Warmooge
ARAABINEWS.COM