Dawlada Somaliya oo u quusgoysay maamulka Siilaanyo oo dalbaday in ajaanib soo dhexgasho: ajaanib maxaa noo keenay: ODAWAA

Muqdisho–Wasiirka arimaha gudaha dawlada Somaliya ayaa sheegay in ay diyaar u yihiin in ay la hadlaan cidkasta oo wax tabanaysa sida Somaliland laakiin uu meesha ka saaray in ajaanib ay soo farageliso. Waxa dad badan ka xanaaqeen hadalada kala duwan ee ka soo baxaya madaxda qaar sida wasiirka arimaha dibedda C/salaam Hadliye oo isagu sheegay in uu soo dhaweynayo fikir sidaasa.

Mudane Cabdiraxmaan Maxamed Xuseen “Odowaa” oo ka qeyb galayay barnaamijka kulanka toddobaadka ee ka baxa Radiyo Muqdisho ayuu sheegay in xalku uu ku jiro in la wada hadlo. “Wada hadalku mar walba waa jidka kaliya ee u furan umadda Soomaaliyeed….. Waxaan aamminsannahay inaad wada hadli karno, hal Soomaaliya ayaa jirta laakin waan kala aragti duwannahay”

Wasiirku wuxuu intaa ku daray in dowladda Soomaaliya ay aamminsan tahay in la wada hadli karo, sidaas darteedna aan loo baahnayn in cid kale ay dhexdhexaadiso dowladda federaalka Soomaaliya iyo Soomaaliland.

“Inaan wada hadalno ayaanba diyaar u nahaye dadka kale maxaa looga baahan yahay? Su’aashaas waxay u baahan tahay jawaab. Wadahadalka marka aad diiddo ayaa waxaa la yiraahdaa qofka gogosha halla soo galiyo…… aan wada hadalno, waan ku heshiin karnaa waxa naga dhaxeeyo” ayuu yiri wasiirka arrimaha gudaha.

C/llaahi Warmooge

ARAABINEWS