Dilalkii argagixisada ee u dambeeyay iyo qoys lix ruux ka kooban oo ay ku dileen Gobolka Gedo

Argagixisada shabaab ayaa maalinkasta disha qof muslim ah waxana u dambeeyay qoys ka kooban lix ruux oo ay ku dileen deegaanka Abaqley ee Gobolka Gedo. Abaqley waxay qiyaastii 15km u jirtaa Degmada Luuq.

Dhacdadaan ayaa dhacday saqdii dhexe ee xalay. Argagixisada waxay isku gadaameen hoyga ay weerareen iyagoona ugu daatay deetana ku dilay lix ruux oo shacab ah.

Dadka la dilay ayaa isugu jira aabe, xaaskiisii, hooyadeed iyo saddex caruur ah oo ninkaasi uu dhalay. Qoyskaasi waxaa la nooleyd marwadii la qabay hooyadeed.

Bogga ku hadla afka argagixisada shabaab ayaa waxaa lagu sheegay in ninka leh guriga la weeraray uu ahaa Sarkaal ka tirsan Saraakiisha Ciidamada Dowladda Somaliya ee Gobolka Gedo.

Saraakiisha Ciidamada Dowladda waxay si xoogan u beeniyeen warka ku aadan in ninkaasi uu ahaa Sarkaal ka tirsan Ciidamada Dowladda. Waxayna taasi bedelkeeda sheegeen inuu ahaa nin beeraley ah.

Ujeedada xasuuqan ayaa sida caadiga ah lagu cabsi galiyaa dadka muslimka ah ee Somaliyeed iyo bulshada ku nool Degmada Luuq.

C/llaahi Warmooge

ARAABINEWS