Wasiiru-dawlaha Amniga ee Wasaaradda Arrimaha Gudaha Somaliland Md. Maxamed Muuse Diiriye, ayaa si badheedh ah u horjoogsaday digreeto Wasiirka wasaaraddaas Md. Yaasiin Maxamuud Xiir (Faratoon) xilka kaga qaaday guddoomiyihii degmada Daarasalaam ee Gobolka Maroodi-jeex, mid cusubna ugu magacaabay.
Wasiir Faratoon, ayaa digreeto uu soo saaray maalintii Salaasada ee toddobaadkan waxa uu guddoomiyaha cusub ee degmada Daarasalaam ugu magacaabay Mr. Cabdikariim Cali Sheekh Maxamed, kadib markii uu xilkaas ka qaaday Ciise Muuse Axmed, isla markaana ku faray Badhasaabka Gobolka Maroodi-jeex inuu sida ugu dhaqsaha badan labadaas masuul xilka ugu kala wareejiyo, taas oo loo ballansanaa Sabtidii shalay.
Hase yeeshee, Wasiiru-dawlaha Amniga Md. Maxamed Muuse Diiriye oo ay ka madaxbannaan yihiin maamulka gobollada iyo degmooyinka, ayaa si cad u horjoogsaday fulinta wareegtadii Wasiirka Wasaaradda Arrimaha Gudaha Somaliland Md. Yaasiin Maxamuud Xiir (Faratoon) oo safar dibadda ugu maqan xilka kaga qaaday guddoomiyihii hore ee degmadaas, masuulka cusubna ugu magacaabay.
Sida ay saxaafadda u xaqiijiyeen ilo-wareedyo ku dhow Wasaaradda Daakhiliga, Wasiir Diiriye ayaa si badheedh ah uga joojiyey Badhasaabka Gobolka Maroodi-jeex xaflad uu xilka ugu kala waraajin lahaa masuulka cusub ee Wasiir Faratoon u magacaabay degmada Daarasalaam iyo guddoomiyihii hore ee uu shaqada ka fadhiisiyey Sabtidii shalay.
Warku waxa uu intaa ku daray, in amarkaas kadib Badhasaabku weydiiyey Wasiiru-dawlaha sababata uu isku hortaagay degreetada wasiirkiisa, inuu si aan gabbasho lahayn ugu jawaabay, “Xilka lagama wareejin karo guddoomiyaha xilka laga qaaday ee degmada Daarasalaam oo aniga ayuu hawlo muhiim ah ii hayaa.”
Tallaabada uu ku kacay Wasiir-dawladaha Amniga ee Wasaaradda Daakhiliga Md. Maxamed Muuse Diiriye oo lagu tilmaamay fool xumo weyn oo dhabar-jab ku ah nidaamka maamulka iyo dawladnimada qaranka Somaliland, ayaa ku soo beegantay xilli uu safar dibadeed dalka kaga maqan yahay wasiirka wasaaraddaas Md. Yaasiin Maxamuud Xiir (Faratoon) oo noqday masuulkii ugu horreeyey ee ka soo jeeda degaannada Gobolka Sool ee qabta xilka wasiirnimada Wasaaradda Arrimaha Gudaha.
Dhinaca kale, qorshaha Maxamed Muuse Diiriye isku hortaagay fulinta digreetada Wasiir Faratoon, ayaa la sheegay inay salka ku hayso fadeexado musuqmaasuq baahsan oo si qarsoodi ah loogu kala iibsanayo dhul-daaqsimeed ballaadhan oo ku yaal degaannada woqooyiga caasimadda Hargeysa, waxaannu Wasiiru-dawlaha Amnigu gadh-wadeen ka yahay hawlgal la tuhunsan yahay inuu ka macaashay boqollaal kun oo doollar laga qaaday ganacsato dhul-doon ah, laguna sheegay in lagu aasayo ceelal dad shacab ah ka qodeen degaankaas.
Maxamed Yuusuf
ARAABINEWS