Soddonkii sano ee u dambeeyay waxaa gayiga soomaaliyeed si xoog leh ugu faafayay afkaarta sumaysan ee wahaabiyada, meeshii ay saldhigtaba waxaa ka dhalanaayay khilaaf diimeed iyo burbur akhlaaqeed, dibudhac iyo dagaallo.
Waxay gelisay soomaaliya burbur, waxayna galaafatay arwaaxda kumanaan kun oo ku nafwaayay weerarada ururada wahaabiyada argagixisada ah, nasiib darro bulshada Soomaaliyeed waxay moodi jireen dad culimo ah oo diin faafinaya ilaa wajigoodii dhabta ahaa uu soo baxay markii la arkay qaraxyada ismiidaaminta ah ee ay ku beegsanayaan xarumaha dadku isugu yimaaddo iyo xarumaha dawladda.
Kolkaas ayay waxgaradku garawsadeen in wahaabiyiintu ay yihiin cadaw ma naxaan ah. fikirka wahaabismku wuxuu ka billowdaa gaalaynta bulshada wuxuuna ku dhammaadaa isku qarxinta bulshada.
Sidee u fikiraa shakhsiga wahaabiga ah?
Qof kasta oo lagu tallaalo fikirka qaldan ee argagixisada wahaabiyada iyadoo looga dhigayo Diintii saxda ahayd waxaa ku dhalanaya naftiisa isbedel aragtiyeed,waxaana ka mid ah isbedelladaas kuwan soo socda:
1.Isla-toosnaan, wuxuu isu arkaa inuu yahay ka dadka ugu qumman ee ugu toosan sidaas darteedna ma aqbalayo wada-hadal ku saabsan aaminaaddiisa, qofkii isku daya inuu u caqli celiyo, wuxuu ugu jawaabi hadalo horay maskaxdiisa loogu biroogiraamiyay kuwaasoo ay ka mid yihiin: “Diintu caqli ma’aha, caqlaani baad tahay” isagoo aasaya garaadka Ilaahay kaga fadilay aadamaha uunka intiisa kale.
2.wuxuu isu arkayaa isaga iyo kooxdiisu inay yihiin kuwo kaliya ee Ilaahay yaqaana caalamkan inta ku nool.
3. Bulshada inteeda kale – taniyo waalidiintii dhalay- wuxuu u arkayaa inay yihiin ahlu-dalaal baadi cad ku sugan ahna mushrikiin ka leexday Manhajka Ilaahay.
4. wuxuu isu qaadanayaa inuu isagu wakiil Ilaahay uga yahay diinta iyo dadka, islamarkaana masuul ka yahay hirgalinta manhaka Rabbi.
5.wuxuu u arkayaa bulshada aragtidiisa aan haysan ee macaaradsan inay yihiin cadawga Ilaahay iyo Rasuulkiisa, ayna waajib ku tahay inuu ladagaallamo/la jihaado cadawga Ilaahay iyo Rasuulkiisa.
6. waxaa qalbigiisa ku dhalanaya kolkaas Cuqdad iyo colaad wayn taasoo uu u qabo bulshada uu la nool yahay isagoo u arka cuqdadan iyo colaaddan inay tahay Ilaahay dartii ( fii sabiilillaah) ajarna ku helaayo.
7. kaddib wuxuu ku kacayaa inuu jaro xidhiidhkii bulshada, wuxuuna ugu horraynba goynayaa xidhiidhintii qaraabada, gacalka, jaarka, tolka, macaarifta iyo guud ahaanba aadamaha. sidaas darteed, wuxuu ka soo hojeedsanayaa oo uu diidayaa wax u tarka iyo wanaag ugu fikirka aadamaha.
8. wuxuu ku tallaabsanayaa dadka aan aragtidiisa aaminsanayn inuu u gaysto dhammaan noocyada xadgudubka, sida inuu ka saaro diinta, taasoo uga dhigan wadada uu u marayo daadinta dhiigooda iyo dhaca maalkooda isagoo aamin inay Ilaahy u xalaaleey xagiisana ugu dhawaanayo.
9. intaas dabadeed, wuxuu isu diyaarinayaa Jihaad isagoo ka damacsan labo arrimood; midda koowaad inuu qaniimaysto hantidooda addoonsadana dumarkooda si uu u buuxiyo baahiyihiisa dhanka caloosha iyo farjiga.
Wuxuuna ku biirayaa mid ka mid ah ururada wahaabiyada ee argagixisada ah sida Alshabab, Daacish, boko xaraam iwm. Midda labaadna inuu ku janno tago dhiigooda sida ay ugu fatwoodaan culimada wahaabiyiinta xubnaha ururadooda hubaysan iyagoo ku dhaha: haddaad adduunyo rabto Jihaadka u kac, haddaad janno rabtana Jihaadka u kac.
Haddaba bulshada uu shakhsigaasi ku dhax nool yahay ma heli kartaa xasillooni, nabadgalyo iyo horumar ? miyuusan shakhsigaasi ka dhignayn Libaax hamuumsan kaasoo dhiig xoolaad u hillaacayo islamarkaasna isha ku haya xoolihii oo daaqaya ? miyuu dayn karaa ?
Soomaalidu waxay horay ugu maahmaaday: ‘Xero bahal ku jiro xoolo kuma dhaqmaan’ sidoo kale meel wahaabiyo joogto way adag tahay in nabad lagu seexdo, horumar iyo dawladnimana ka hanaqaadaan.
Qalinkii fadiilatul Sheekh Xuseen Muuse
ARAABINEWS
