Kaluumayste u dhashay dalka Uganda oo dilay Yaxaas ka cunay xaaskiisa oo uur lahayd

Uganda 12 Jan 2015–Kaluumayste u dhashay dalka Uganda ayaa dilay Yaxaas weyn kadib markuu ka cunay xaaskiisa oo uur lahayd xilli ay xaabo ka guranaysay goob haro ah. Demeteriya Nabwire, oo ahayd haweenayda u dhaxday kalluumaystaha ayaa lahayd uur 8 bilood ah, wuxuuna yaxaasku ku cunay subaxnimadii axada ee shalay harada Kyoga ee kutaala bariga Uganda.

Dadka deegaanka ayaa helay dacas ay xirnayd haweenaydaan, oo ay wehliyeen suulasheeda, faraheeda iyo mobile laga helay goobta uu yaxaasku ku dilay sida ay shaacisay wakaalada wararka ee New Vision.

Ninkeeda, Mubalak Batambuze, oo 56 jir oo ku hubaysnaa waran ayaa ugaarsaday oo dilay yaxaaskaan.

Dadka deegaanka ayaa ammmaanay geesinimada ninkaan, kuwaasoo aaminsan in Yaxaasku mas’uul ka ahaa dhimashada dad badan, oo ay ku jireen caruur iyo haween, iyo kuwo kale oo uu dhaawacay.

Hay’adda Duurjoogta Uganda ayaa sheegtay inay saraakiil u dirtay goobta, kuwaas oo helay yaxaas cabirkiisa lagu qiyaasay 7.5 m iyo culayskiisa oo ah in ka badan 1,000 kg.

C/llaahi Warmooge

ARAABINEWS