Qaar ka tirsan fanaaniinta xidigaha Hargeysa ay shil galay. Sida ay sheegayaan wararka naga soo gaaraya Duleedka Tuulada Abaarso oo 15-KM dhinaca Galbeed ka xigta Magaalada Hargeysa, waxaa halkaasi shil Gaari ku galay koox ka tirsan Fanaaniinta Xidigaha Geeska.
Xubnahan ka tirsan Fanaaniinta Xidigaha Geeska ee maanta ka baxay Magaalada Hargeysa ayaa la sheegay in ay ku sii jeedeen Magaalada Arabsiyo.
Qof tirsan kooxda Fanaaniinta Xidigaha Geeska oo la hadlay warbaahinta gudaha ayaa sheegay Fanaaniinta in ay saarnaayeen Gaari nuuciisa uu yahay HAMMER oo uu leeyahay Musician-ka kooxda Axmed Weli Furinle.
Waxa uu sidoo kale sheegay Gaariga in ay saarnaayeen ilaa Todobo xubnood kuwaasi oo isugu jiray fannaaniin iyo Abwaannada ugu caansan kooxdaas.
Xubno ka tirsan Fanaaniinta xidigaha Geeska ayaa xaqiijiyay shilkan in uusan geysan khasaare dhimasho iyo dhaawac, balse keliya uu bur bur soo gaaray Gaariga ay wateen Fanaaniintan.
Ujeedada socdaalkooda ayaa lagu sheegay mid Dalxiis ah, iyagoo doonayay inay isla maanta ku soo laabtaan Magaalada Hargeysa ee caasimadda Maamulka Soomaaliland.
Maxamed Yuusuf
ARAABINEWS