Tahriibayaal halis ku jirey oo Boosaaso la keenay

Doonyo ka mid ah kuwa Ciidamada badda maamulka Puntland ayaa xalay magaalada Boosaaso ee xarunta gobolka Bari soo gaarsiiyey 92 qof oo tahriibayaal ah kuwaas oo uu badda cas kasoo badbaadiyey Markab ka mid ah kuwa Ciidamada NATO ee ilaaliya xeebaha Puntland.

7 ka mid ah dadkaan ayaa Soomaali ah waxaana ku jirta haweenay uur leh, iyadoo 85 kalena ay yihiin dad u dhashay dalka Itoobiya, tahriibayaasha ayaa doontii ay ku safrayeen waxay cilad ku qabsatay badda Cas, waxaana gurmad u fidiyey Markabka NATO oo maamulka Puntland ku soo wargeliyey inay dadkaas u timaado.

Puntland ayaa xaqiijisay inay gacanta ku hayso Kooxdii doontii masuulka ka ahayd ee dadkaan tahriibinaysay, waxaana la rumaysan yahay in doontu ay markii hore ka baxday xeebaha Puntland ayna ku sii jeeday dalka Yeman, halkaas oo inta badan dad Soomaaliyeed iyo Itoobiyaan fara badan ay u tahriibaan sanad walba.

Xiriiro kala duwan oo la sameeyay 92-da qof ee Tahriibayaasha ah ee xalay Boosaaso lasoo gaarsiiyey iyagoo safarka halista badan khatar ku galay balse lasoo badbaadiyey ayaa ogaaday in xaaladooda caafimaad ay wanaagsan tahay marka laga reebo haweenay uur leh oo Soomaali ah oo hadda lagu dabiibayo Isbitaal ku yaalla magaalada Boosaaso.

Si kastaba ha ahaatee laamaha Ammaanka magaalada Boosaaso ayaa sheegay inay dadkaan kala saari doonaan, waxaana si gaar ah loo cinqaabi doonaa kooxda wax tahriibinaysay.

C/llaahi Warmooge

ARAABINEWS