Turkiga oo Maraykanka ku eedeeyay inuu toos ula jiro Giriiga

Wasaarada arimaha dibedda Turkiga ayaa wax laga xumaado ku tilmaantey xarun Maraykanku ka dhisay Qubrus oo lagu tababaro milatariga xilli uu Qubrusta Guriiga u ogolaaday inay hub soo iibsan karaan, kana qaaday cunaqabataynta. Turkiga ayaa talaabadan ku tilmaamay mid jar iska xoora.

Maraykanka ayaa saldhig ku leh Turkiga, waxana saldhigyadaas uu uga duulaa wadamada Muslimka ah suda Ciraaq iyo Suuriya. Turkiga ayaa u muuqda inuu cidla taagan yahay isagoo lagu yaqaanay inuu kolba dhinac u cararo.

”Siyaasada Turkiga ee Suuriya iyo Liibiya ayaa gaartey meel xun, waxana cad in Turkigu cantuugey cad weyn oo aanu liqi karayn ayuu yiri Xuseen Warsame. Inkastoo qorshayaasha badankooda ay maalgeliso Qadar, waxa hadda cad in Maraykanku diidey siyaasadiisa ayuu raaciyay.

Turkiga maxaa u furan

Erduqaan oo aad isku balaariyay waxa diidan dhamaan wadamada badda kula jaarka ah inkastoo uu leeyahay waxaan saliid ka baarayaa badda inta aan xaqa u leehay. Ruushka oo inta badan uu ku cararo marka Maraykanku ka soo horjeedsado ayuuna waxba ula harin gaar ahaan arinta Suuriya iyo Liibiya.

”Waxa u furan inuu faraha kala baxo arinta Suuriya qaasatan taageerida argagixisada gobolka Idlib., taas waxay abuureysaa in Suuriya maamusho dalkeeda, xiriir fiicana uu la yeesho Ruushka ayuu raaciyay Xuseen Warsame.

Si kastaba ha ahaatee uma malaynayo in uu sii xumeyn doono xiriirka uu la leeyahay Maraykanka oo dib u gurasho samayn doono sida haddaba uu dib ugu ceshaday markabkii baarayay saliida kadib cadaadin kaga timi Maraykanka iyo Jarmalka.

Hay’adaha reer galbeedka ee amaahda Maraykanku maamulo ayaa iyaguna weerar ku qaaday lacagaha Turkiga.

Rashiid Ceelaanyo

ARAABINEWS