Wararkii ugu dambeeyay xasuuqii argagixisada ee ka dhacay Muqdisho

Wararkii ugu dambeeyay qaraxii ka dhacay Muqdisho.

Gaari waxyaabaha qarxa laga soo buuxiyay oo uu kaxeynayay Ismiidaamiye ka tirsanaa argagixisada Shabaab ayaa beegsaday goob ay ku shaaheynayeen dad shacab ah oo aan waxba galabsan.

Halkaasi oo uu ku dilay dad ku dhow 20 qof, halka tiro intaas ka badana uu ku dhaawacay, warar kale oo la helayo ayaa waxa ay sheegayaan in weerarkan loo adeegsaday Bajaaj lagu soo raray waxyaabaha qarxa.

Dhammaan dadkii ku dhaawacmay qaraxaasi oo u badnaa dhalinyaro Mooto Bajaaj ku shaqeysaneysay ayaa waxaa la dhigay Isbitaalada Magaalada Muqdisho, halkaasi oo lagu dabiibayo, ehehlada dadkaasi ayaa tan iyo xalay ku sii qul qulayay Isbitaalada, si u booqdaan dadka ka dhaawacmay.

Ciidanka Booliska Soomaaliya ee sida gaarka ah loogu tababaray Baarista Qaraxyada oo caawimaad ka helaya Saraakiil cadaan ah ayaa ku hawlan Baarista Qaraxan, si ay u soo saaraan natiijada kama dambeysta ah.

Wasaaradda Arrimaha Dibadda ee Sacuudiga iyo Imaaraadka Carabta ayaa muujisay cambaareyn xooggan oo ku aadan qaraxan, waxayna tilmaameen Shabaab in aysan u tureynin shacabka Soomaaliyeed.

Waaxda Nadaafadda Gobolka Banaadir oo isla shalay gelinkii dambe tagay goobta uu qaraxa ka dhacay ayaa nadiifiyay haraadiga qaraxa ka dhashay, iyada oo isu socodka gaadiidka iyo dadweynaha ee wadadaasi uu saakay dib u furmay, inkastoo weli ay muuqato waxyeelada qaraxa.

C/llaahi Warmooge

ARAABINEWS