Wasaarada arimaha dibedda Somaliya oo warbixin ka soo saartey la dagaalanka tahriibka

Muqdisho–Wasaarada arimaha dibeda Somaliya ayaa warbixin ka soo saartey tahriibka dishatay dhalaanka ka qayb qaadan lahaa dib u dhiska dalka. Wasarada oo uu hogaamiyo Dr C/salaam Hadliye ayaa warbixin dheer ku sheegtay in ay kala shaqayn doonto wadamada jaarka ah iyo kuwa kalaba sidii loo joojin lahaa tahriibka.

Wasaaradda Arrimaha Dibadda iyo Dhiirigelinta Maalgashiga , waxa ay u aragtaa tahriibka mid dhabarka ka jabinaya jiilkii cusbaa ee dalku u baahnaa inay kaga qeyb qaataan dib u dhiskiisa iyo horumarkiisa .

Dowladda Federaalka Soomaaliya, waxa ay kala kaashan doontaa Dowlado iyo hey’ado sidii loo dejin lahaa qorshe lagu xakameynayo socdaalka sharci darada ah ee dhalinyarada Soomaaliyeed ay naftooda ugu biimeeyaan Wadamada Angola,South Africa, Yemen , Saudi Arabia , Sudan , Libya iyo Italy , iyagoo ka tallaabaya dhul saxaro ah oo halis badan, badweynta India , Badda Cas iyo badda MediterraneanÂ oo doomaha cinjirka ah ee ay ku socdaalaan ay inta badan kula degto.

Wasaaradda Arrimaha Dibadda iyo Dhiirigelinta Maalgashiga, waxa ay ugu baaqeysaa waalidiinta Soomaaliyeeda inay kaalin muuqata ka qaataan wacyigelinta caruurtooda , kuna baraarujiyaan qatarta tahriibku leeyahay.

Wasaaradda Arrimaha Dibadda iyo Dhiirigelinta Maalgashiga , waxa ay muujin doontaa dadaalo dheeraad ah iyadoo la kaashaneysa qaar ka mid ah hey’adaha dowladda Federaalka Soomaaliya, dowladaha saaxiibka ah iyo Ururo caalami ah si loo hakiyo gebi ahaan dhaq dhaqaaqa dadka wax tahriibiya , loona suura-geliyo in la horkeeno cadaaladda.

C/llaahi Warmooge

ARAABINEWS