Wararka laga helayo dalkaasi yar Qubrus qaybta Giriiga ayaa sheegaya in diyaarad ay leedahay Masar maanta subaxnimadii hore loo weeciyay halkaas iyadoo uu jiro nin sheegtay in uu xiran yahay walxaha qarxa. Afduubkan ayaa hadda la sheegayaa in dadkii saarnaa diyaarada intooba badan la soo daayay.
Diyaaradan ay Masar leedahay ayaa ku socotay caasimada Qaahira iyadoo ka soo duushay magaalada xeebta ku taal ee Alagsandariya ee isla Masar,,waxase markiiba diyaarada weeciyay ninkan oo sheegtay in uu xiran yahay walxaha qarxa.
Diyaarada ayaa waxa saarnaa dad dhalasho ahaan ka soo kala jeeda 8 Maraykana, 4 Ingiriisa, 4 Hollandeesa, 2 Beljim ah, 1 Talyaani ah, iyo 30 Masaari ah.
Wararka ayaa sheegaya in rakaabka intiisa badan la sii daayay laakiin uu reebtay afar ajaaniba oo aan la sheegin wadamada ay ka soo kala jeedaan.
Arinta ugu daran ayaa noqotey in ninkani aanu ahayn argagixiso laakiin laga soo wariyay in uu fariin u dirayay xaaskiisa oo hadda la sheegay in ay ku soo socoto madaarka.
Madaxa madaarka oo la waydiiyay in arintu tahay JACAYL ayaa intuu qosley yiri ” had iyo jeer waxa ku jirta haween”. Wararkii ugu dambeyay ayaa wali sheegaya in ay jiraan rakaab la haysto.
Rashiid Ceelaanyo
ARAABINEWS