Dhalinyaro Somali ah oo sharci daro loogu haysto jasiirada Siishalis ayaa war laga soo saaray. Wasiirka Arrimaha Dibadda Soomaaliya Yuusuf Garaad Cumar oo booqdey jasiirada ayaa war la wadaagey saxaafada.
Dhallinyarada xabsiga ku jirta markii aan la kulmay iyada oo uu i wehliyo Xoghayaha Arrimaha Dibadda ee Seychelles, Danjire Barry Faure iyo Madaxa Xabsiyada Seychelles, Raymond Ange, waxay ii soo dhoweeyeen iina marxabbeeyeen si aad u diirran oo laga dareemi karo Soomaali-jacayl, Inkastoo xorriyad la’aan iyo xukun dheer ay ku jiraan, haddana dhallinyarda kama muuqan ilgooyo iyo niyad jab toona” ayuu yiri Yuusuf Garaad
Wasiir Yuusuf Garaad ayaa sidoo kale booqday 6 dhallinyaro ah oo Soomaali ah oo ay ciidammada Midowga Yurub ee xeebta Soomaaliya ilaaliyaa ay ka soo qabteen aagga Degmada Marka ee Shabeellada Hoose, toddobaadkii hore, dalkanna ku xirnaa Afar maalmood, waxayna ku eedeysan yihiin burcadbadeednimo.
“Waxay ku doodayaan in ay ahaayeen kalluumeysato, Nimankaan wax hub ah laguma arag doontooda, Waxay leeyihiin matoorka ayaa ka xumaaday doonta markaas ayay jihada ay doonto noola sabbeysay”
“Markii aan is wareysannay iyada oo ay joogaan Mas’uuliyiinta Arrimaha Dibadda Seychelles, kuwa xabsiga iyo laba xubnood oo ah UNODC, ayaan qol gooni ah tegey oo aan mid mid u wareystay lixdaan nin ee dhallinyarada ah”
C/llaahi Warmooge
ARAABINEWS