Imaaraadka oo laga bilaabay khamaar xalaala sideese u shaqeeyaa

Shalay ayay ahayd markii magaalada Dubay la dhigey khamaarkii ugu horeeyay ee la sheegay inuu xalaal yahay. Lacagta lagu furey ayaa ahayd lacag gaaraysa 100 kun oo doolar oo uu ku guulaystay qofkii ugu horeeyay. Sabtida soo socota ayaa waxa taala lacag gaaraysa 10 milyan oo doolar oo la siin doono qofka ku guulaysta.

Haddii la waayo qof ku guulaysta waxa lacagtaas lagu darayaa lacagaha kale waxana Sabtida ku xigta sii badanaysa lacagta taala ee la helayo.

Haddaba sidee u shaqaysaa

Maamulka Imaaraati Loto oo ah magaca khamaarka xalaasha ayaa sheegay in tartankan ay ka soo baxdey fatwo ka dhigeysa xalaal lacagta la helayo iyo sida loo iibsanayaba.

Maaha khamaar ee waa mashruuc aad wax ku urursanayso ayuu yiri maamulaha. Waxaad iibsanaysaa kaadhadh oo aad urursanaysaa waxaana kuu furan fursada aad uga qayb gasho tartanka usbuuclaha ama kaadhadhkaasi waa iska haysan kartaa.

Waxaad ku iibsan kartaa kaadhadhkaas hab internet ah meelkasta oo aad joogto aduunka ama waxaad ka iibsan kartaa meelo badan oo ku yaala Imaaraadka.

Sawirka hoose waa kaadhka aad iibsan karto si laguugu daro qori tuurka dhaca Sabti walba. Waxana ku sawiran astaamaha Imaaraadka.

Kaadhadhka sare ayaa waxa la daabacaa in kooban waxana dhacaysa in aanad helin. Maamulaha shirkadan ayaa sheegay in kaadhkasta leeyahay lambar qofku eeganayo inuu wax helay iyo in kale. Qofka lixda lambar wada hela wuxuu helayaa lacagtoo dhan halka qofka 5 lambar helaana uu qaadanayo lacag fiican.

Qofka 4 lambar helaana uu helayo lacag halka qofka sadex lambar helaa lagu darayo usbuuca ku xiga asagoo waxva bixin.

Sabtida soo socota waxa taala lacag gaaraysa 10 milyan oo doolar. Xilli lagu jiro dhaqaale hoos u dhac waxaa noo qorshaysan in aan lacagta ugu badan siino laamaha dawlada iyo hay’adaha sadaqada bixiya si danyarta loogu gargaaro ayuu yiri maamulaha shirkadan.

Lama garan karo in shirkado kale soo bixi doonaan mar haddii culimada Imaaraadku ku sheegeen xalaal. Waxa laga iibsan karaa kaadhadhka bogga Emirates Loto.

Rashiid Ceelaanyo

ARAABINEWS