Jawaari oo diiday inuu aqbalo madaxweyne lagu dooranayo maamulka sadexda gobol ee ka socda Baydhabo: Warsaxaafadeed

Baydhabo 17 Nov 2014–Gudoomiyaha barlamaanka ayaa diiday inuu aqbalo natiijada doorasho la filayo in ay maanta ka dhacdo magaalada Baydhabo halkaas oo dawladu hore u hakisay hanaankii wax u socdeen warsxaafadeedna ka soo saartay. Maamulka lixda gobol ayaa iyagu qaadacay.

Shariif Xasan ayaa ka mida raga isku soo sharaxay maamulka sadexda gobol iyadoo dad badan ka qaylinayaan in aanu waxba ku soo kordhinayn.

Warsaxaafadeedka ayaa u qornaa sidan soo socota:

Iyadoo sidoo kale la ogsoon yahay go’aankii Ra’isulwasaaraha Xukuumadda ee soo baxay 01-11-2014 oo cadeynayey in aanan la qaban karin doorasho inta ay Dowladda Federaalka Soomaaliya ka hubineyso iney si buuxda uga wada qeyb qaataan qeybaha bulshada ka go’aan gaarista masiirka iyo maamul u dhisidda gobollada Koonfur Galbeed.

“Hadaba ayadoo la xeerinayo qodobbadan kor ku xusan waxaa halkan looga digayaa guddiga iyo ergada shirka maamul dhisidda Koonfur Galbeed iney ku kicin wax carqalad ku keeni kara habsami u socodka maamul dhisidda gobollada Koonfur Galbeed Soomaaliya iyo sidoo kale go’aammo dhalin kara carqalad,xasilooni darro iyo dib u dhac baaxad weyn oo ku yimaada xaqiijinta himilada dhismaha maamul loo wada dhan yahay.

Ugu dambeyn waxaan halkaan ku cadeynayaa natiijo kasta oo khilaafsan go’aannada Dowladda ee kor ku xusan ineysan Dowladda Federaalka Soomaaliya aqoonsan doonin ayadoo taasina ay xad gudub ku noqoneyso Dastuurka Dalka qodobkiisa 48aad,farqada 2aad ee siineysa Xukuumadda Federaalka awoodda hagidda iyo maamul dhisidda gobollada dalka,mas’uuliyadda wixii cawaaqib xumo ah ee ka yimaadana ay qaadi doonaan cidii ku xad gudubta go’aammada Dowladda Federaalka Soomaaliya.

C/llaahi Warmooge

ARAABINEWS.COM