Kiiniya oo bilowday inay si hoose u hubeyso maleeshiyaad

Wararka laga helayo deegaanada xad beeneedka ee gobolada Gedo iyo Jubadda hoose ayaa sheegaya in goobahaas laga dareemayo dhaqdhaqaaqyo hubeysan oo ku hubeysan hub Kiiniya leedahay. Jabhadaha goobtaas lagu abuurayo ayaa ujeedadu tahay inay weeraraan gobolka Gedo iyo deegaanada Jubadda hoose ee ay joogaan ciidanka dawlada ee aan haysan hub wanaagsan.

Dawlada oo si dhow ula socota dhaqdhaqaaqa ciidanka Kiiniya iyo maleeshiyada ay wadato ayaa qoraal ka soo saaray arimtan sidan hoose u qornaa:

Dowladda Soomaaliya waxay si dhaw ula socotaa abaabulka militari ee ay Kiiniya maalmahan ka waddo aagga Madheera iyada oo hubeynaysa jabhad ay si sharci darro ah dalkeeda ugu martigelisay si xasillooni daro looga abuuro gudaha Soomaaliya.

Dowladda Soomaaliya waxay ogaatay in Ciidamada Kiiniya ay hub iyo maleeshiyaad ku soo daad-gureysay magaalada Madheera si duullaan loogu soo qaado magaalada Beled-Xaawo iyo saldhigyada Ciidanka Xoogga Dalka Soomaaliyeed ee aaggaas ku yaala.

Dowladda Soomaaliya waxay uga digeysaa Dowladda Kiiniya ficillada guracan ee ay ku wiiqayso nabadgalyada guud ee Gobolka Geeska Afrika, waxayna mar kale ku celinaysaa in ay Kiiniya ka fiirsato faragelinta qaawan ee ay ku hayso arrimaha gudaha Soomaaliya oo ay ka dhalan karto xasillooni daro saameyn ku yeelata amniga Gobolka.

Aaga Madheera ayaa dadka qaar bilaabeen inay ka barakacaan siiba xaafadaha u dhow xadka inkastoo aanay badneyn.

C/llaahi Warhaye

ARAABINEWS