Dr C/raxmaan Bayle oo fariin u direy ganacsatada Somaliyeed

Wasiirka Maaliyadda Xukuumadda Somaliya Dr C/raxmaan Ducaale Bayle ayaa fariin u diray ganacsatada Somaliyed waxaana uu kula dardaarmay inay ilaashadaan hantidooda qurbaha u taallo.

Wasiir Bayle oo maanta Saxaafadda kula hadlay Magaalada Muqdisho, ayaa sheegay inay jiraan ganacsato badan oo Somaliyed, kuwaasi oo hantidooda ay taallo dalalka caalamka, waxaana uu ugu baaqay ganacsatadaasi inay dalkooda ay ku sameeyaan Maalgashi.

Wuxuu sheegay Ganacsatada in loo baahan yahay dhagta inay u taagnaato oo hantidooda ay ilaashadaan, waxaana uu sheegay muwaadin kasta dalkiisa inuu muhiim u yahay.

“Ha is dhiganin, dhegtaada iyo Ishaada iney taagnaato ayaan kugula talinayaa, waxaan kugula talinayaa inaad amniga maalkaada ilaaliso, meesha ugu amaansan ee aad amaan ka heleyso waa dalkeena oo aan wada dhisano, soo noqo, dalkan ku soo noqo, amnigiisa aan wada dhisno, maalkaada keen oo maskaxdaada keen oo muruqaada keen” ayuu yiri Wasiir Beyle oo farriintiisa u muuqatay mid ku socotay Ganacsatada Soomaaliyeed ee Hantida ku leh dalka Kenya.

Somali farabadan ayaa ganacsato yaryar iyo kuwa weynba kuleh wadamada jaarka iyo kuwa Carabta kadib burburka dalka.

C/llaahi Warmooge

ARAABINEWS

Share on Facebook

Tweet

Follow us

Save